Tuesday, September 10, 2019

வியாழேந்திரனாலும், அவரது கருப்புச்சட்டை காவாலிகாளாலும் பறிக்கப்பட்ட அப்பாவி உயிர்

வியாழேந்திரனாலும், அவரது கருப்புச்சட்டை காவாலிகாளாலும் பறிக்கப்பட்ட அப்பாவி உயிர்

கடந்த மாதம் 27ஆந் திகதி சியோன் தேவாலய தற்கொலைதாரியின் உடற்பாகங்களை மட்டக்களப்பு கள்ளியங்காடு இந்து மயானத்தில் புதைத்தமைக்காக கல்லடிப் பாலத்தில் போக்குவரத்தை முடக்கிச் செய்யப்ப்பட்ட ஆர்ப்பாட்டம் காரணமாக, ஆறு பிள்ளைகளின் தந்தை ஒருவர் அநியாயமாக இறந்து போனமை தொடர்பில் தற்போது செய்திகள் வெளிவந்துள்ளன.

மகிந்த தரப்பிடம் கோடிகளை வாங்கிக்கொண்டு கட்சி மாறியதால் அழிந்து போன செல்வாக்கை சரி செய்ய ஆர்ப்பாட்ட அரசியல் செய்து, தனது ஈனச்செயலை மக்களின் மனதில் இருந்து மறக்க வைக்க பறந்தது திரியும் மட்டக்களப்பு கருப்புச்சட்டை அரசியல்வாதியின் செயற்பாட்டாலேயே இந்த மரணம் சம்பவித்ததாக கூறப்படுகிறது.

பட்டிப்பளை பிரதேசத்தின் கடுக்கமுனை கிராமத்தை பிறப்பிடமாகவும் மட்டக்களப்பு திராய்மடு எனும் இடத்தை தற்போதைய வதிவிடமாகவும் கொண்ட அழகிப்போடி நேசராசா தனது வாழ்வாதாரத்துக்காக முச்சக்கர வண்டி ஓட்டி வருபவர்.

27.08.2019 ஆந் திகதி தனது உறவினர்களான பெண்கள் இருவரை கடுக்கமுனையிலிருந்து தனது முச்சக்கரவண்டியில் ஏற்றிக் கொண்டு மட்டக்களப்பு திராய்மடு கிராமத்தை நோக்கி பயணித்துக் கொண்டு இருக்கிறார்.

கல்லடிப்பாலத்தை அண்மித்ததும் தான் இவர்களுக்கு தெரிகிறது, பாலத்தின் போக்குவரத்து முற்றாக நிறுத்தப்பட்டு,வாகனங்களும் மக்களும் நெருக்கியடித்துக் கொண்டு முன்னும் போக முடியாமல் பின்னும் நகர முடியாமல் அவதிப்பட்டுக்கொண்டிருப்பது.

சன நெரிசலுக்குள் மாட்டிக்கொண்ட முச்சக்கரவண்டியை மீண்டும் கல்லடியை நோக்கி கொண்டு செல்ல நேசராசா முயற்சிக்கையில், அதன் 'ஸ்டார்ட்' நின்று விடுகிறது.

தன்னியக்க முறையும் கை கொடுக்காமையினால் பதறிப்போன நேசராசா, பெண்கள் இருவரையும் பத்திரமாக கொண்டு சேர்க்க வேண்டும் என்ற பதட்டத்தில், இழுவை மூலம் இயந்திரத்தை உயிப்பிக்க பலமுறை முயற்சி செய்கிறார்.

இருதய நோயாளியான நேசராசா இழுவை மூலம் சோர்ந்து போனதோடு ஒருவழியாக முச்சக்கர வண்டியை 'ஸ்டார்ட்' செய்து மிகவும் சோர்ந்து போன நிலையில் கல்லடியில் உள்ள தமது உறவுக்கரரின் வீடு வரை செல்கிறார். அங்கு சென்றதும் தனக்கு குடிக்க தண்ணீர் கேட்கிறார். தண்ணீர் கொடுத்த போதிலும் அதனை குடிக்காமலேயே அவ்விடத்தில் மயங்கி விழுகிறார்.

துடித்துப் போன உறவினர்கள் ,உடனடியாக அம்பியூலன்சை அழைத்து, நேசராசாவை ஏற்றிக்கொண்டு மட்டக்களப்பு போதனா வைத்தியசாலைக்கு விரைந்தனர். ஆனால் வியாழேந்திரனாலும் அவரது கருப்புச்சட்டை காவாலிகாளாலும் TMVP செல்வியினாலும் உணர்ச்சியூட்டப்பட்ட மக்கள் கூட்டம் கல்லடிப் பாலத்தின் ஊடான போக்குவரத்தை மறித்து ஆர்ப்பாட்டம் செய்து கொண்டிருந்தது.

நோயாளியின் நிலையை சொல்லி அம்பியூலன்சுக்கு வழிவிடுமாறு கெஞ்சியும் வியாழனின் கருப்புச்சட்டை நாடகக் குழு வழி விடவில்லை. பொலிசாரின் தடியடிக்குப் பின்னரே அம்பியூலன்சுக்கு வழி கிடைத்தது. ஆனால் பாவம் வைத்தியசாலைக்கு கொண்டு செல்லும் போதே நேசராசா இறந்துவிட்டார்.

மனிதாபிமானமற்ற இந்த சாவுக்கு யார் காரணம்?. இதற்கு தண்டனை வழங்கப்பட வேண்டியவர்கள் யாவர்?

தற்கொலைதாரியின் உடற்பாகங்களை அன்று புதைக்கப் போகிறார்கள் என்று தனக்கு ஏற்கனவே தெரியும் என்றும், அதை எங்கே புதைகிறார்கள் என்று தாம் அவதானித்துக் கொண்டு இருந்ததாகவும் வியழேந்திரன் தனது வாயாலேயே தொலைக்காட்சி நிகழ்வொன்றில் தெரிவித்திருந்தார்.

இதனால் அவர் அன்று நடைபெற்ற மாவட்ட அபிவிருத்திக் குழுக் கூட்டத்திலும் கலந்து கொள்ளவில்லை. புதைக்கப் போகிறார்கள் என்று தெரிந்த இவர் உரிய அதிகாரிகளை தொடர்பு கொண்டு முன்னரே இதனை தடுத்திருக்கலாம்.

அன்று நடைபெற்ற மாவட்ட அபிவிருத்திக் குழுக் கூட்டத்துக்கு போய் இவ்விடயம் தொடர்பாக அறிவித்து தடுத்திருக்கலாம். அல்லது புதைத்த பின் சட்டப்படியாக நீதிமன்று மூலம் நடவடிக்கை எடுத்து இருக்கலாம்.

ஆனால் உடற்பாகங்கள் புதைத்த பின் ஒரு அரசியல் நாடகம் செய்ய வேண்டிய தேவை இவருக்கும் இவரது கருப்புச்சட்டை நாடக குழுவுக்கும் இருந்தது.

கல்லடிப்பாலம் என்பது மட்டக்களப்பு வாவியின் இரு புறங்களையும் இணைக்கும் பிரதான பகுதி. இதை போக்குவரத்துக்கு தடை செய்வதால் பல தரப்பட்டோர் இன்னல்களுக்கு உள்ளாவர்.

அவசர தேவையுடைய மக்கள், நீண்ட தூரம் பயணம் செய்வோர், வெளிநாட்டு பயணங்களுக்காக விரைவோர், வைத்தியசாலைக்கு விரையும் நோயாளிகள், நோயாளிகளை ஏற்றிச் செல்லும் அம்பியூலன்ஸ் வண்டிகள், கடமைக்கு செல்லும் வைத்தியர்கள், தாதியர்கள், பாடசாலை செல்லும் மாணவர்கள் என எண்ணிலடங்காத மக்கள் சிரமமடைவார்கள் என்பதை யாவரும் உணர்ந்து கொள்ள வேண்டும்.

கள்ளியங்காடு மயானத்துக்கருகில் கூடிய மக்களின் உணர்வுகளை தூண்டி, சத்தமாக கத்திக்கொண்டு , அவர்களை வியாழன் குழுவும் TMVP குழுவும் கல்லடி பாலத்துக்கு கூட்டிச்சென்ற நோக்கம் என்ன? கல்லடிப் பாலத்தை முடக்கி மக்களுக்கு சிரமத்தை ஏற்படுத்தி தாங்கள் பம்மாத்து அரசியல் செய்வது தானே இவர்களது நோக்கம்.

மக்களுக்கு ஏற்படும் பிரச்சனைகளுக்கு உரியவாறு தீர்வு பெற்று தருவதற்கு தானே, இவர்களுக்கு மக்கள் வாக்களித்தார்கள். தங்களது அரசியல் விளம்பரத்துக்கு கூத்தாடும் வியாழன் செல்விக்கு மக்கள் என்ன தண்டனை கொடுக்கப் போகிறார்கள் ? நீதிமன்றம் என்ன தண்டனை வழங்கப் போகிறது. நேசராசாவின் சாவுக்கு காரணமானவர்களுக்கு என்ன தண்டனை?

இச்செய்தி வெளியீட்டின் பின் வியாழன் குழு நேசராசாவின் வீட்டுக்கு சென்று மிரட்டலாம். பணத்தை வழங்கி அவர்களது வாயை மூட முயற்சி செய்யலாம். இனிமேலும் இவ்வாறு நடக்காமல் இருக்க நேசராசாவின் குடும்பத்தார் போலீசாருக்கும் நீதிமன்றுக்கும் முழு ஒத்துழைப்பு வழங்க வேண்டும். பொலிசார் உறவினர்களின் வாக்குமூலம், வைத்தியசாலை அறிக்கை, அம்புயுலன்ஸ் ஊழியர்களின் வாக்குமூலங்களை பெற்று இந்த அநியாய சாவுக்கு காரணமானவர்களுக்கு தண்டனை பெற்றுக் கொடுக்க வேண்டும்.
சஜித்தை நியமிப்பதைத் தவிர, விக்ரமசிங்கவுக்கு வேறு வழியில்லை - அசாத் சாலி

சஜித்தை நியமிப்பதைத் தவிர, விக்ரமசிங்கவுக்கு வேறு வழியில்லை - அசாத் சாலி

அமைச்சர் சஜித்தை வேட்பாளராக நியமிப்பதைத் தவிர பிரதமர் ரணில் விக்ரமசிங்கவுக்கு வேறு வழியில்லை என முன்னாள் மேல் மாகாண ஆளுநர் அசாத் சாலி தெரிவித்துள்ளார்.

இன்றையதினம் -10- கொழும்பில் இடம்பெற்ற செய்தியாளர் சந்திப்பின்போதே அவர் இதனைத் தெரிவித்துள்ளார்.

தொடர்ந்தும் அவர் குறிப்பிடுகையில்,

ஐக்கிய தேசிய கட்சியின் ஜனாதிபதி வேட்பாளராக சஜித் பிரேமதாசவை நியமிக்கவேண்டும் என கட்சியின் நாடாளுமன்ற குழு மற்றும் செயற்குழுவில் பெரும்பான்மையானவர்கள் கோரிக்கை விடுத்திருக்கின்றனர்.

அதேபோன்று ஐக்கிய தேசிய கட்சியுடன் கூட்டணி அமைத்திருக்கும் கட்சிகளும் சஜித் பிரேமதாசவுக்கு ஆதரவளிப்பதாக தெரிவிக்கின்றன. அதனால் ஜனாதிபதி வேட்பாளராக சஜித் பிரேமதாசவை நியமிப்பதைத்தவிர ரணில் விக்ரமசிங்கவுக்கு மாற்றுவழியில்லை.

அத்துடன் சஜித்துக்கு ஆதரவாக கூட்டம் நடத்தியமைக்காக அமைச்சர்களான அஜித் பி பெரேரா மற்றும் சுஜீவ சேனசிங்க ஆகியோருக்கு எதிராக ஒழுக்காற்று நடவடிக்கை எடுக்கப்போவதாக கட்சியின் செயலாளர் அறிவித்திருக்கின்றார்.

இவர்கள் கட்சிக்கு எதிராக செயற்படவில்லை. கட்சியை பலப்படுத்தவே செயற்பட்டுள்ளனர்.

ஆனால் கட்சியை காட்டிக்கொடுத்து இன்று பொதுஜன பெரமுனவுடன் இணைந்துகொண்டு கட்சிக்கு எதிராக செயற்படுபவர்களுக்கு எதிராக செயலாளரினால் எந்த நடவடிக்கையும் எடுக்க முடியாமல் உள்ளது என குறிப்பிட்டுள்ளார்.
சவூதியிலுள்ள 2 இலட்சம் இலங்கையர்களின், பிரச்சினைகளில் கவனம் செலுத்துமாறு கோரிக்கை

சவூதியிலுள்ள 2 இலட்சம் இலங்கையர்களின், பிரச்சினைகளில் கவனம் செலுத்துமாறு கோரிக்கை

இலங்கை முஸ்லிகளுக்கான ஹஜ் கோட்டாவை அதிகரிக்க நடவடிக்கை எடுப்பதாக சவூதி மஜ்லிஸ் சூரா கவுன்சில் தலைவர்  அஷ்ஷேக் கலாநிதி அப்துல்லாஹ் பின் முஹம்மத் பின் இப்ராஹீம் தெரிவித்தார்.

சபாநாயகர் கரு ஜயசூரியவின் அழைப்பையேற்று மூன்று நாட்கள் உத்தியோக பூர்வ விஜயம் மேற்கொண்டு இலங்கை வந்துள்ள  சவூதி அரேபிய மஜ்லிஸ் சூரா கவுன்சிலின் தலைவர் மற்றும் தூதுக்குழுவினர் சபாநாயகர் கருஜயசூரியவை நேற்று பாராளுமன்ற அலுவலகத்தில் சந்தித்து கலந்துரையாடினர். 

இதன்போது இந்த சந்திப்பில் கலந்துகொண்டிருந்த பாராளுமன்ற உறுப்பினர் ஏ.எச்.எம்.பெளசி, இலங்கைக்கு வழங்கப்பட்டிருந்த ஹஜ் கோட்டா தவிர்க்க முடியாத சில காரணங்களுக்காக சிறிது காலத்துக்கு குறைக்கப்பட்டிருந்தது.

என்றாலும் தற்போது வழங்கப்பட்டு வரும் கோட்டா எமக்கு போதுமானதாக இல்லாமல் இருக்கின்றது. அதனை அதிகரித்து வழங்க நடவடிக்கை எடுக்கவேண்டும் என கேட்டுக்கொண்டார்.

அத்துடன் சவூது அரேபிய ராஜ்ஜியத்தில் பல்வேறு துறைகளில் பணியாற்றிவரும் சுமார் 2இலட்சம் இலங்கையர்கள் அந்நாட்டில் எதிர்கொண்டுவரும் பல்வேறு பிரச்சினைகள் தொடர்பில் கவனம் செலுத்துமாறும் இதன்போது சவூதி மஜ்லிஸ்  சூரா சபை தலைவரிடம் எடுத்துரைக்கப்பட்டது.


(எம்.ஆர்.எம்.வஸீம்)

Sunday, September 1, 2019

சம்பிக , ரிஷாத் , ஹக்கீம் , மனோ சஜித் பக்கம் ; ஹர்ஷ அறிவித்தார்..

சம்பிக , ரிஷாத் , ஹக்கீம் , மனோ சஜித் பக்கம் ; ஹர்ஷ அறிவித்தார்..

ஐக்கிய தேசிய முன்னணியின் ஜனாதிபதி வேட்பாளர் சர்ச்சை இன்னும் முடிவுக்கு வராத நிலையில் அமைச்சர்கள் சம்பிக ரனவக  , ரிஷாத் பதுர்தீன் , ரவுப் ஹக்கீம் , மனோ கனேசன் உள்ளிட்ட அனைவரும்  சஜித் பிரமேசவுக்கு ஆதரவு வெளியிட்டுள்ளதாக  அமைச்சரவை அந்தஸ்தற்ற அமைச்சர்  ஹர்ஷ டி சில்வா தெரிவித்துள்ளார்.

மனோ கனேசன் , ஹக்கீம் உள்ளிட்டவர்கள் சஜித்துக்கு ஆதரவாக இருப்பதாக ஏற்கனவே தகவல்கள் வெளியான நிலையில் சம்பிக மற்றும் ரிஷாத் ஆகியோரும் ஆதரவளிப்பதாக ஐக்கிய தேசிய கட்சி பிரபலம் ஹர்ஷ குறிப்பிட்டுள்ளார்.
ஜனாதிபதித் தேர்தலை ஒத்திப்போட முடியுமா?

ஜனாதிபதித் தேர்தலை ஒத்திப்போட முடியுமா?

ஜனாதிபதிப் பதவியை இல்லாமல் செய்வதற்கும் அதற்கு வசதியாக ஜனாதிபதித் தேர்தலை ஒத்திப்போடுவதற்கும் ரணில், மஹிந்த, மைத்திரி ஆகியோர் முன்னெடுப்பொன்றைச் செய்வதாக செய்திகள் உலாவருகின்றன.

இம்மூவரைப் பொறுத்தவரையும் ஜனாதிபதிப் பதவி தலையிடியானதொன்று என்பது அனைவரும் அறிந்ததே!

ஜனாதிபதித் தேர்தல்
—————————
ஜனாதிபதியின் பதவிக்காலம் ஐந்து வருடம் என்பது நமக்குத் தெரியும். ஜனாதிபதித் தேர்தல் ஒரு ஜனாதிபதியின் பதவிக்காலம் முடிவடைவதற்கு இரண்டு மாதங்களுக்கு கூடாத, ஒரு மாதத்திற்குக் குறையாத காலப்பகுதிக்குள் நடாத்தப்படவேண்டும். சரத்து 31(3)

ஜனாதிபதியின் பதவிக்காலம் ஜனவரி எட்டாம் திகதி முடிவடையும். எனவே, தேர்தல் டிசம்பர் எட்டாம் திகதிக்கு முன்னரான அதேநேரம் நவம்பர் எட்டாம் திகதிக்கு முற்படாத ( அதாவது 08/11/2020 இற்கும் 08/12/2020 இற்கும் இடைப்பட்ட) ஒரு திகதியில் நடாத்தப்பட வேண்டும். இதனடிப்படையில்தான் டிசம்பர் 7ம் திகதியை தேர்தல் ஆணைக்குழுத் தலைவர் அடிக்கடி குறிப்பிட்டிருக்கின்றார்.

ஒரு சட்டத்தைத் திருத்துதல்
——————————————
ஒரு சட்டமூலம் (அமைச்சரவையினால் அங்கீகரிக்கப்பட்டதன்பின்)  வர்த்தமானியில் பிரசுரிக்கப்படவேண்டும். (சரத்து 78) அதிலிருந்து இரு வாரங்களின்பின் பாராளுமன்ற ஒழுங்குப்பத்திரத்தில் சேர்க்கப்படவேண்டும். அதிலிருந்து ஒரு வாரத்திற்குள் எந்தவொரு பிரஜையும் அச்சட்டமூலத்தை உயர்நீதிமன்றில் சவாலுக்குட்படுத்தலாம்.

சவாலுக்குட்படுத்தும் அடிப்படைகள்.
————————————————
எந்தவொரு சட்ட மசோதாவையும் சவாலுக்குட்படுத்தும் ஒரேயொரு அடிப்படை இம்மசோதா அரசியலமைப்பிற்கு முரண் என்பதாகும். 

அரசியலமைப்பைப் பொறுத்தவரை இரு வகையான சரத்துக்கள் இருக்கின்றன. ஒரு வகை: அவற்றை மூன்றில் இரண்டு பெரும்பான்மையால் திருத்தலாம். இன்னுமொரு வகை: மூன்றில் இரண்டு பெரும்பான்மையுடன் சர்வஜன வாக்கைடுப்பும் தேவை:  சரத்து 83 இன் பிரகாரம் பின்வருவன இவ்வகையான சரத்துக்களாகும்.
சரத்துக்கள்: 1,2,3,6,7,8,9,10, 11,30(2) ( இது ஜனாதிபதியின் பதவிக்காலத்தைக் குறிக்கிறது), 62(2) ( இது பாராளுமன்றப்பதவிக்காலத்தைக் குறிக்கிறது) இந்த இரு பதவிக்காலத்தையும் நீடிக்கின்ற திருத்தம்;  

இந்த சர்வஜன வாக்கெடுப்பின் தேவையை கோருகின்ற இச்சரத்துக்கள் சரத்து 83 இல் குறிப்பிடப்பட்டுள்ளதால் அச்சரத்தைத் திருத்துவதற்கும் சர்வஜன வாக்கெடுப்புத் தேவை ( இந்த சரத்து 83ஐ சற்று ஊன்றி வாசியுங்கள்; ஜனாதிபதியின் பதவிக்காலத்தை நீடிக்க முடியுமா? இல்லையா? என்பது இந்த சரத்து 83இல்தான் தங்கியிருக்கின்றது.

ஒரு சாதாரண சட்ட/ சட்டத்திருத்தத்திற்கான மசோதாவை உயர்நீதிமன்றில் சவாலுக்குட்படுத்தும்போது உயர்நீதிமன்றம் அம்மசோதா அரசியலமைப்பிற்கு முரண்படவில்லை; எனக் கூறலாம். அல்லது

சரத்து 83இல் குறிப்பிடப்பட்ட சரத்துக்கள் தவிர்ந்த வேறு ஏதாவது ஒன்று அல்லது ஒன்றுக்கு மேற்பட்ட சரத்துக்களுடன் குறித்த மசோதா அல்லது அதன் சில பகுதிகள் முரண்படுகின்றது, அல்லது முரண்படுகின்றன; எனக்கூறலாம்.

அவ்வாறு முரண்படுமாயின் இரு வகையான தீர்வை முன்வைக்கலாம்: ஒன்று: குறித்த வசனங்களை நீக்கினால் அல்லது இவ்வாறு திருத்தினால் முரண்படாது. அதன்பின் சாதாரண பெரும்பான்மையால் நிறைவேற்றலாம்; என்பதாகும். இரண்டு: 2/3 பெரும்பான்மையால் நிறைவேற்றவேண்டும்; என்பதாகும்.

அதேநேரம் அம்மசோதா, மேலே சரத்து 83இல் கூறப்பட்ட ஏதாவதொரு சரத்துடன் முரண்பட்டால் சில நேரம் நீதிமன்றம் திருத்தத்தை முன்வைக்கலாம் அல்லது சர்வஜன வாக்கெடுப்பைக் கோரலாம்.

அவதானம் செலுத்துக
——————————-
இங்கு குறிப்பிடுவது சாதாரண சட்டத் திருத்தமாகும்.  சாதாரண சட்டத் திருத்தத்திற்குக்கூட சிலவேளை 2/3 உடன் சர்வஜன வாக்கெடுப்பும் தேவை என நீதிமன்றம் கூறலாம்; என மேலே பார்த்தோம். ஆனாலும் அது சாதாரண சட்டமே. 2/3 ஆல் நிறைவேற்றியதால் அல்லது சர்வஜன வாக்கெடுப்பும் நடாத்தியதால் அது அரசியலமைப்புச் சட்டத்தில் சேராது. 

எனவே, அவ்வாறு 2/3 பெரும்பான்மையாலும் சர்வஜன வாக்கெடுப்பாலும் நிறைவேற்றப்பட்ட ஒரு சாதாரண சட்டத்தை பின்னர் நீக்குவதாக இருந்தால் சாதாரண பெரும்பான்மை போதும். சரத்து 84(3)

இதற்குப் பின்னால் உள்ள தத்துவம் என்னவென்றால் இச்சட்டம் அமுலுக்கு வரும்போது அரசியலமைப்பின் குறித்த சரத்துக்களில் தாக்கம் செலுத்துகின்றது. அதனை நீக்கும்போது அரசியலமைப்பு பழைய நிலைக்கு வருகிறது. அத்தாக்கம் இல்லாமல் போகிறது. தாக்கத்தை ஏற்படுத்த விசேட அனுமதி தேவை. தாக்கத்தை இல்லாமலாக்க சாதாரண அனுமதி போதும்.

உதாரணமாக, அரசியலமைப்பு தடுத்த ஒரு விடயத்தை இச்சட்டம் அனுமதிக்கலாம். அதற்கு மக்கள் ஆணை தேவைப்படலாம். அதனை நீக்கும்போது அரசியலமைப்புச் சட்டம் பழைய நிலைக்கு வந்துவிடுகிறது. அதனால்தான் “ சாதாரண பெரும்பான்மையால் நீக்கிவிடலாம்” என்று சரத்து 84(3) கூறுகிறது.

இப்பொழுது சிந்தித்துப் பாருங்கள்; புதிய மாகாணசபைச் சட்டத்தை நீக்கிவிட்டு பழைய தேர்தல்முறைக்குச் செல்வதற்கு 2/3 தேவையா? நிச்சயமாகத் தேவையில்லை. சிலர் புரியாமல் தேவை என்கிறார்கள். சிலர் புரிந்தும் மாகாணசபைத் தேர்தலைத் தள்ளிப்போட ஒரு சாட்டாக 2/3 தேவை என்கிறார்கள்.

அரசியலமைப்புத் திருத்தம்
———————————-
அரசியலமைப்புத் திருத்தமாயின் 2/3 பங்கு சுயமாகத் தேவை. நீதிமன்றில் சவாலுக்குட்படுத்துவது மேலே கூறப்பட்ட சரத்து 83 இல் குறிப்பிடப்பட்ட சரத்துக்களுடன் முரண்படுகின்றது; என்பதாகும். அதனை நீதிமன்றம் ஏற்றுக்கொண்டால் சர்வஜன வாக்கெடுப்பைக் கோரும்.

ஜனாதிபதிப் பதவியை ஒழித்தல்
—————————————-
மேற்கூறிய மூவரும் ஜனாதிபதிப் பதவியை ஒழிக்க விரும்புவதாகக் கூறப்படுகிறது. இன்றைய சூழ்நிலையில் அவர்களது சொந்தக்கட்சியில் உள்ளவர்களே அதனை ஏற்றுக்கொள்வார்களா? என்ற கேள்வி ஒரு புறம் இருக்க எப்படியோ 2/3 ஐப் பெறுகிறார்கள்; என வைத்துக்கொண்டால் இம்மூவரும் இணைந்தால் சர்வஜன வாக்கெடுப்பில் வெற்றிபெறுவதும் சிரமமாகாது. ( ஜனாதிபதி பதவியை ஒழிக்க 2/3 உடன் சர்வஜன வாக்கெடுப்பும் தேவை).

அவ்வாறாயின் பிரச்சினை என்ன? பிரச்சினை காலஅவகாசம். 

தேர்தலுக்கு இன்னும் மூன்று மாதங்கள் இருக்கின்றன. சட்டமூலத்தை வரைந்து அமைச்சரவை அனுமதி பெறுவதற்கு ஒரு வாரம், வர்த்தமானியில் பிரசுரித்தபின் ஒழுங்குப்பத்திரத்தில் சேர்ப்பதற்கு இருவாரங்கள், சர்வஜன வாக்கெடுப்பும் நடாத்தப்படுவதால் நீதிமன்றில் சவாலுக்குட்படுத்தும்நிலை எழாது. எனவே ஆகக்கூடியது ஐந்து வாரங்களுக்குள் 2/3 ஆல் நிறைவேற்றலாம்.

அதன்பின் சபாநாயகர் கையொப்பம் வைத்ததும் ஜனாதிபதி சர்வஜன வாக்கெடுப்பிற்கான பிரகடனம் வெளியிட வேண்டும். அதிலிருந்து ஒரு மாதத்தின் பின் சர்வஜன வாக்கெடுப்பை நடாத்த வேண்டும். அதன்பின் ஜனாதிபதி கையொப்பமிடவேண்டும். அத்துடன் ஜனாதிபதிப் பதவி ஒழிந்துவிடும். 

எனவே, சட்டரீதியாக அடுத்த மூன்று மாதங்களுக்குள் தாராளமாக ஜனாதிபதிப் பதவியை ஒழிக்கலாம். சர்வஜன வாக்கெடுப்பு முடிவடைந்து ஜனாதிபதி கையொப்பம் வைக்கும்வரை தேர்தல் ஆணைக்குழு ஜனாதிபதித் தேர்தலுக்கான நடைமுறைகளை செய்தே ஆகவேண்டும். 

சிலவேளை ஜனாதிபதித் தேர்தலுக்கு குறிக்கப்பட்ட திகதிக்குமுன் சர்வஜன வாக்கெடுப்பு முடிவடையாவிட்டால் குறித்த திகதியில் ஜனாதிபதித்தேர்தல் நடைபெறும். ஜனாதிபதிப் பதவியை ஒழிப்பதற்கான சர்வஜன வாக்கெடுப்பைக் காரணம்காட்டி தேர்தலை ஒத்திப்போடமுடியாது. சர்வஜன வாக்கெடுப்பு நிறைவேறிவிட்டால் தேர்தல் நடவடிக்கை தானாகவே செயலிழந்துவிடும்.

இங்கு கேள்வி, சட்டரீதியாக அடுத்த மூன்று மாதங்களுக்குள் ஜனாதிபதிப்பதவியை ஒழிக்க முடியுமென்றபோதிலும் அரசியல்ரீதியாக அது சாத்தியமா? என்பதாகும்.

ஒரு புறம் ஜனாதிபதியை சம்மதிக்க வைக்கவேண்டும்; என்றால், அடுத்த அரசாங்கத்தில் அவருக்கு ஓர் உயர்பதவி கோருவார். இல்லையெனில் அவரது கட்சி பா உ க்களின் ஆதரவு கிடைக்காமல் போகலாம். மட்டுமல்ல, 2/3 ஆல் நிறைவேற்றினாலும் அதை நான் ஏற்றுக்கொள்ள மாட்டேன்; என்று சர்வஜன வாக்கெடுப்பிற்கான பிரகடனத்தை வெளியிட மறுக்கலாம். பாராளுமன்றம் நிறைவேற்றிய நம்பிக்கையில்லாப் பிரேரணையையே ஏற்றுக்கொள்ள மறுத்தவர். அதன்பின் உயர்நீதிமன்றம் சென்றுவர காலஅவகாசம் இருக்காது.

மறுபுறம் சஜித்தையும் கோட்டாவையும் ஆதரிக்கும் பா உ க்கள் சம்மதிப்பார்களா? அவர்களைச் சம்மதிக்கவைக்க காலஅவகாசம் தேவை.

அடுத்தது; எதிர்கால நிறைவேற்று அதிகாரமற்ற ஜனாதிபதியின் அதிகாரங்கள் எவை? முக்கியமாக எதிர்கால ஜனாதிபதியை நியமிப்பது பிரதமரா? பாராளுமன்றமா? ( 72ம் ஆண்டு யாப்பில் பிரதமரே நியமித்தார் - பிரிவு 25)  போன்ற விடயங்களைப் பேசித்தீர்மானிக்க அவகாசம் தேவை.

பாராளுமன்றத் தேர்தல்முறையையும் மாற்ற முற்படலாம். தற்போதைய முறையின்கீழ் எந்தக் கட்சியும் இலகுவில் அறுதிப்பெரும்பான்மை பெறமுடியாது. ஜனாதிபதி ஆட்சிமுறை அரசுக்கு ஸ்த்திரத்தன்மையை வழங்குகிறது. அப்பதவி ஒழிக்கப்படும்போது ஒரு கட்சி தனித்து ஆட்சியமைக்கக்கூடிய வகையில் தேர்தல்முறை மாற்றப்பட வேண்டும்; என்ற கருத்து அவர்களிடம் ஏற்கனவே இருக்கிறது. ( இங்குதான் சிறுபான்மைகளுக்கு பிரதான ஆபத்து இருக்கின்றது) எனவே இவைகளைத் தீர்மானிக்க காலஅவகாசம் தேவை. இந்தப்பின்னணியில்தான் தேர்தலை ஒத்திவைக்க முற்படுகிறார்கள்.

தேர்தலை ஒத்திவைக்க முடியுமா?
——————————————-
உயர்நீதிமன்றம் பல தீர்ப்புகளில் கூறியது, பதவிக்காலத்தை நீடிக்க சர்வஜன வாக்கெடுப்புத் தேவை; குறைக்கும்போது மீண்டும் அதே மக்களிடம் செல்வதால் தேவையில்லை; என்பதாகும். ஏனெனில் பதவிக்காலத்தை நீடிப்பதென்பது மக்கள் ஆணைக்கப்பால் செல்கிறது . அது சரத்து மூன்றில் கூறப்பட்ட வாக்குரிமையைப் பாதிக்கின்றது. எனவே, சர்வஜன வாக்கெடுப்பு தேவை.

தற்போதைய ஜனாதிபதியின் பதவிக்காலம் ஐந்து வருடங்கள். அதனை இன்னுமொரு ஆறு மாதங்கள் நீடிப்பதாயினும் கண்டிப்பாக சர்வஜன வாக்கெடுப்புத் தேவை. தேர்தலை ஆறு மாதம் ஒத்திப்போடுவதற்காக சர்வஜன வாக்கெடுப்பு நடாத்த முடியுமா? அதற்காக பல நூறு கோடி ரூபாய்களை செலவுசெய்ய முடியுமா? அது பாரிய விமர்சனத்தைக் கொண்டுவராதா?

இந்தப்பின்னணியில் சர்வஜன வாக்கெடுப்பின்றி அவசர அவசரமாக 2/3 ஆல் மாத்திரம் தேர்தலை ஒத்திப்போட ஒரு முயற்சி நடைபெறலாம். இதனால்தான் சில சிறுபான்மைக் கட்சிகள் உசாரடைந்திருக்கிறார்கள்.

சாதாரண சூழ்நிலையில் சர்வஜன வாக்கெடுப்பின்றி தேர்தலை ஒத்திப்போடவே முடியாது. ஆனால் 19வது திருத்தத்தில் இன்னுமொரு தவறு நடந்திருக்கின்றது. அது சிலவேளை வேண்டுமென்றே விடப்பட்டதா? என்ற கேள்வியும் எழுகிறது. இந்த தவறு ஒத்திப்போடுவதில் பிரதான பங்குவகிக்கலாம்.

மேலே கூறப்பட்ட சரத்து 83(b), 19 வது திருத்தத்துக்கு முன் பின்வருமாறு கூறியது: அதாவது, சரத்து 30(2)ஐ அல்லது 62(2) ஐ ஜனாதிபதியின் பதவிக்காலத்தை அல்லது பாராளுமன்றத்தின் பதவிக்காலத்தை ஆறு வருடங்களுக்குமேல் நீடிப்பதற்காகத் திருத்துவதாயின் சர்வஜன வாக்கெடுப்பு வேண்டும்; எனக் கூறியது.

அப்பொழுது “ஆறு வருடத்திற்குமேல்” எனக் கூறியதற்கான காரணம் அப்போது ஜனாதிபதியின்/ பாராளுமன்றத்தின்  பதவிக்காலம் ஆறு வருடமாகும். எனவே, அதற்குமேல் செல்வதற்கு சர்வஜன வாக்கெடுப்பு தேவை.

இப்பொழுது பதவிக்காலம் ஐந்து வருடமென்பதால் இது ஐந்து வருடங்களுமேல் நீடிப்பதாயின் வாக்கெடுப்புத்தேவை; எனத் திருத்தப்பட்டிருக்க வேண்டும். ஆனால் இச்சரத்து திருத்தப்படவில்லை. இப்பொழுதும் “ஆறு வருடத்திற்குமேல்” என்றுதான் இருக்கின்றது. 

இதில் 30(2) ஐ பதவியை நீட்டுவதற்கு ( வாக்கெடுப்பின்றி) திருத்தமுடியாது; என்றுதான் இருந்தது. இப்பொழுது 30(2)/62(2) ஐத் திருத்தி ஐந்தாக குறைத்து விட்டார்கள். ஆனால் 83(2) ஆறை ஐந்தாக குறைக்கவில்லை. இது ஒரு தவறாக இருக்கலாம்; அல்லது வேண்டுமென்றே விடப்பட்டிருக்கலாம்.

காரணம், இவற்றைக்கூறுகின்ற 83 ஐத் திருத்துவதற்கும் சர்வஜன வாக்கெடுப்புத் தேவை என்று கூறப்பட்டிருக்கின்றது.

30(2)/62(2) இற்கும் 83 இற்கும் இடையில் உள்ள வித்தியாசத்தைப் புரிந்துகொள்ள வேண்டும். இரண்டையும் பற்றி 83 இல் தான் குறிப்பிடப்பட்டுள்ளது. அதில் 30(2)/62(2) ஐ பதவியை நீட்டுவதற்காக வாக்கெடுப்பின்றி திருத்தமுடியாது; என்றுதான்  குறிப்பிடப்பட்டுள்ளது. குறைப்பதற்காக அல்லது அடியோடு திருத்தக்கூடாது; எனக் குறிப்பிடப்படவில்லை.

எனவே, பதவியைக் குறைப்பதற்காக 30(2) ஐயும் 62(2)ஐயும் திருத்திவிட்டார்கள். 83 அப்படியல்ல. அதில் 83 ஐத் திருத்தக்கூடாது; என்று மட்டும்தான் கூறப்பட்டுள்ளது. எனவே, 83 இல் உள்ள “ஆறு” என்ற சொல்லை “ஐந்து” என்று மாற்றினால் 83 ஐத் திருத்தியதாகிவிடும்; சர்வஜன வாக்கெடுப்பின்றி திருத்தமுடியாதே, என நினைத்து அப்படியே விட்டிருக்கலாம்.

இப்பொழுது எழுகின்ற கேள்வி 83(2) இல் ஆறு வருடங்களுக்குமேல் வாக்கெடுப்பின்றி நீடிக்கக்கூடாது; என்றுதான் இருக்கின்றது. எனவே, இன்னுமொரு ஆறு மாதம் நீடிப்பது இச்சரத்திற்கு முரணாகாது; என்ற அர்த்தத்தை எடுக்கமுடியாதா? இது அவர்களால் முன்வைக்கக்கூடிய ஒரு வாதம். ( Literal interpretation).
 
எதிர்வாதம்
—————
ஜனாதிபதியின் பதவிக்காலம் ஐந்து வருடம் எனும்போது “ ஆறு வருடம்” என்பது அந்த இடத்தில் எவ்வாறு பொருத்தும். இங்கு “ ஆறு வருடம்” என்பது “ நீடிக்கப்படுதல்” என்பதற்குரிய அடைமொழி மாத்திரமே”. இங்கு “ ஆறு” என்ற சொல்லிற்கு நேரடியான எண்கணித வியாக்கியானம் பொருந்தாது. இதற்கு இயற்கையான அல்லது சூழ்நிலைக்கேற்ற ( contextual) வியாக்கியானமே வழங்கப்பட வேண்டும். 

அதாவது “ ஆறு வருடங்களுக்குமேல் நீடிக்கப்படக்கூடாது” என்பதில் உள்ள “ ஆறுவருடங்களுக்குமேல்” என்ற அடைமொழியை “ ஜனாதிபதியின் பதவிக்காலம் எதுவோ அதற்குமேல் நீடிக்கக்கூடாது” என்றே வியாக்கியானப்படுத்த வேண்டும். சுருங்கக்கூறின் “ ஆறு” என்பது “ ஐந்து” என்று வாசிக்கப்பட வேண்டும்.

இதற்கு வலுச்சேர்க்கும் இன்னுமொரு வாதம், இவ்வாறான ஒரு திருத்தம் அடுத்த ஜனாதிபதித் தேர்தலுக்குப்பின் கொண்டுவந்தால் அப்பொழுது மக்கள் ஐந்து வருடங்களுக்களுக்கே ஆணை வழங்கியிருப்பார்கள். அந்நிலையில் மக்கள் ஆணையின்றி இன்னுமொரு ஆறு மாதம் நீடிக்கமுடியுமா? அது மக்கள் ஆணையை மீறியதாகும். 

அவ்வாறு மீறினால் அது சரத்து மூன்றில் கூறப்பட்ட “ வாக்குரிமையைப்” பாதிக்கும். அவ்வாறு பாதிக்குமானால் சர்வஜன வாக்கெடுப்பு தேவை. எனவே, சரத்து 83ம் சரத்து 3 ம் ஒன்றுடன் ஒன்று முரண்பட்டதாக இருக்கமுடியாது. இரண்டும் ஒன்றுக்கொன்று இசைவுடையதாக இருக்கவேண்டுமானால் “ ஆறு வருடம்” என்பது “ஜனாதிபதியின் பதவிக்காலத்திற்கு மேலதிகமாக “ என்பதையே அடையாளப்படுத்துகின்றது; என பொருள் கொள்ளப்படல் வேண்டும்.

நீதிமன்றம் சிலசமயங்களில் “May” என்ற சொல்லை “ Shall “ என்று அந்த இடத்திற்கேற்றாற்போல் வியாக்கியானப்படுத்துவதுபோன்று இங்கு “ ஆறு” என்பது “ ஐந்து” என்றே வியாக்கியானப்படுத்தப்படவேண்டும்.

மறுவார்த்தையில் கூறுவதானால் 83(2) இன் அடிப்படை 30(2)/62(2) ஐ, பதவிக்காலத்தை நீடிப்பதற்காக வாக்கெடுப்பின்றி திருத்த முடியாது; என்பதே! அப்போதைய பதவிக்காலம் ஆறு வருடம் என்பதால் அது அப்போதைய பதவிக்காலத்தைக் குறித்ததேதவிர வெறும் எண்கணித கணக்கைக் குறிக்கவில்லை.

மறுவாதம்
—————-
சரி, அவ்வாறு “ஆறை” ஐந்து என எடுத்துக்கொண்டாலும் இந்த ஜனாதிபதிக்கு ஆறு வருடங்கள் மக்கள் ஆணை கிடைத்ததே! எனவே, இந்த ஜனாதிபதியின் பதவியை இன்னும் ஆறுமாதம் நீடிப்பது சரத்து 3 இற்கெதிரானதல்லவே! என மறுவாதத்தை முன்வைக்கலாம். இது வலுவான ஓர் வாதம்.
 
எதிர்வாதம்
—————
83(2) ஜனாதிபதியின் பதவிக்கால நீடிப்பை மாத்திரம் குறிப்பிடவில்லை. அது 62(2) ஐயும் குறிப்பிடுகின்றது. அதாவது பாராளுமன்ற பதவிக்கால நீடிப்பும் ஆறு வருடங்களுக்குமேல் செய்யமுடியாது; என்றுதான் கூறுகின்றது. தற்போதைய பாராளுமன்றத்திற்கு மக்கள் ஐந்து வருடங்களுக்கே ஆணை வழங்கியிருக்கின்றார்கள். எனவே, அந்த “ஆறு” என்ற சொல்லை “ஆறு” எனக்கொண்டு பாராளுமன்ற பதவிக்காலத்தை இன்னுமொரு ஆறு மாதம் நீடித்தால் அது மக்கள் ஆணையை மீறதா? சரத்து 3 ஐப் பாதிக்காதா?

சரத்து 83(2) இல் வருகின்ற “ ஆறு வருடங்கள் “ எனும் சொற்றொடரை ஒரே சமயத்தில் பாராளுமன்ற ஆயுட்காலத்தை நீடிக்க “ ஐந்து” என்றும் ஜனாதிபதியின் பதவிக்காலத்தை நீடிக்க “ ஆறு” என்றும் வியாக்கியானப்படுத்த முடியுமா? 

எனவே, ஜனாதிபதியின் பதவிக்காலம் ஐந்து வருடங்கள் மாத்திரமே. அதை ஒரு நாளால் அதிகரிப்பதென்றாலும் 2/3 உடன் சர்வஜன வாக்கெடுப்பும் தேவை. 

சிலவேளை 
—————-
இந்த ஜனாதிபதி ஆறு வருடத்திற்கு மக்களால் தெரிவுசெய்யப்பட்டார். பாராளுமன்றம் அதனை ஐந்து வருடமாக குறைத்தது. இன்று அதே பாராளுமன்றம் அதை இன்னுமொரு ஆறு மாதங்களால் நீட்டுவது மக்கள் ஆணைக்கு முரணல்ல. எனவே, இந்த ஜனாதிபதிக்கு மட்டும் ஒரு இடைக்கால ஏற்பாடாக இப்பதவி நீடிப்பை வழங்கலாம்; என்ற ஒரு நிலைப்பாட்டை நீதிமன்றம் சிலவேளை ஏற்றுக்கொண்டால் தேர்தல் ஒத்திவைக்கப்படலாம். 

அவ்வாறு ஒத்திவைக்கப்பட்டால் அது சிறுபான்மைகளுக்கு, குறிப்பாக முஸ்லிம்களுக்கும் மலையகத் தமிழருக்கும் பாரிய ஆபத்தாக வந்துமுடியும். தற்போது இருக்கின்ற இரு வகைப்பாதுகாப்பும் இழக்கப்படுகின்ற நிலை ஏற்படும்.

அதாவது ஜனாதிபதியைத் தெரிவுசெய்வதில் சிறுபான்மைகளுக்கு இருக்கின்ற பலம் இல்லாமலாகிவிடும். ஜனாதிபதி முறைமையில் சிறுபான்மைகளுக்கு சில சாதகங்களும் சில பாதகங்களும் இருக்கின்றன. ( அவற்றை இன்னுமொரு ஆக்கத்தில் பார்ப்போம்).

தற்போதைய பொதுத்தேர்தல் முறைமை சிறுபான்மைகளுக்கு ஒரு வரப்பிரசாதமாகும். ஒருபுறம் நமது விகிதாசாரத்திற்கேற்ப அண்ணளவாக ஆசனங்களைப்பெற உதவுகிறது.
மறுபுறம், எந்தவொரு தேசியக்கட்சியும் அதிகமான சந்தர்ப்பங்களில் சுயமாக பெரும்பான்மை  பெறமுடியாத நிலையில் பாரியதொரு பேரம்பேசும் சக்தியை அது சிறுபான்மைகளுக்கு வழங்குகிறது.

“ யானையின் பலம் யானைக்குத் தெரிவதில்லையாம் அது இறக்கும் நேரம் வரும்வரை”, என்பதுபோல் நமது கட்சிகளுக்கு இந்தப்பலம் புரியாதது அல்லது புரிந்தும் அதனை தம்சொந்த நலனுக்காக மட்டும் உபயோகிப்பது என்பது நாம் பொருத்தமான தலைமைத்துவத்தை/ பிரதிநிதித்துவத்தை தெரிவுசெய்யத்தவறுவதால் ஏற்படும் துரதிஷ்ட நிலையாகும்.

மறைந்த தலைவரைப்போன்று தகுதியான தலைமைத்துவம் அமையுமானால் இம்முறையின்கீழ் நமது அனைத்துப் பிரச்சினைகளையும் தீர்க்க முடியும். நமது கையாலாகாத்தனம் வேறு. ஆனால் இத்தேர்தல்முறை மாற்றப்படுமானால் இந்தியாவை விடவும் மோசமான நிலைக்கு சிறுபான்மை பொதுவாகவும் முஸ்லிம்கள் குறிப்பாகவும் தள்ளப்படலாம்.

எனவே, இவ்விடயத்தில் சிறுபான்மைகள், குறிப்பாக முஸ்லிம்கள் மிகவும் கவனமாக இருக்கவேண்டும்.
xZahirians அழகு இல்லம் அடிக்கல் நாட்டு விழா - மாவனல்லை ஸாஹிரா

xZahirians அழகு இல்லம் அடிக்கல் நாட்டு விழா - மாவனல்லை ஸாஹிரா

xZahirians அமைப்பின் சமூக நலத்துறை பிரிவின் முதலாவது செயற்திட்டத்திட்கான அடிக்கல் நாட்டும் வைபவம்  "அழகு இல்லம்" என்ற தொனிப்பொருளில் கடந்த ஆகஸ்ட் 28, வியாழக்கிழமை மாவனல்லை மெடேரிகம பிரதேசத்தில் இடம்பெற்றது.

மாவனல்லை பிரதேச செயலாளர் திருமதி ப்ரியாங்கனி பெதன்கொட அவர்களின் வழிகாட்டுதலின் அடிப்படையில் இச் செயற்திட்டம் அமுல்படுத்தப்படுகின்றது.


மாவனல்லை ஸாஹிரா கல்லூரியின் பழைய மாணவர்களால் உருவாக்கப்பட்ட xZahirians அமைப்பானது கடந்த ஒரு வருடமாக பழைய மாணவர்களுக்கான வளர்ச்சித் திட்டங்கள், மாணவர்களுக்கான வளர்ச்சித்திட்டங்கள், கல்விசார் வளர்ச்சி நிகழ்ச்சிகள், மற்றும் இளைஞர் வழுவாக்கல் செயற்திட்டங்களையும் செய்துவருகிறது. “அழகு இல்லம்” செயற்திட்டமானது xZahirians பயணத்தின் இன்னும் ஒரு மையில்கல் ஆகவே கருதப்படுகிறது. இது xzahirians இன் சமூக நலத்துறை பிரிவின் முதலாவது செயற்திட்டம் ஆகும்.


இவ்வைபவத்தில், சபரகமுவ மாகாண ஆளுநர் திரு. தம்ம திஸாநாயக்க, xZahirians அமைப்பின் மூலோபாயக் குழு உறுப்பினரும் சமூக ஆர்வலருமான அல்-ஹாஜ் கமால்தீன், ஹிங்குலோயா மஸ்ஜிதுல் ஹுதா தலைவர் டாக்டர் ஹமீத் ஏ அஸீஸ், மற்றும் XZahirians மூலோபாய குழு அங்கத்தவர் திரு முஷ்தாக் அலி, சமூக ஆர்வலர் அல் ஹாஜ் முபாரக், xzahirians அமைப்பின் நிறைவேற்றுக் குழு அங்கத்தவர்கள், நன்கொடையாளர்கள் உற்பட மற்றும் பல முக்கியஸ்தர்களும் கலந்து சிறப்பித்தனர்.




பகிர்வு - ஷாம்ரான் நவாஸ்